بطل يدق (21)

قلبي بطل يدق
و الليل اصبح سراب
و العقل اصبح جماد
و الغربة تملي عايشة في الاوطان
و السما دايما معفرة
و الحب ملهوش مكان في دنيا النسيان
يوم وراه يوم بيعدي
و قلبي ساكت مايقولشي
ميقولش علي ظلم السنين
ميقولش علي حلم عدي واتنسي
علي كلام هجر السطور وراح لغربة تانية
من وطن مش فاكرني
وقلب مش عايز يدق. 

دنيا معاندة (20)

اجيب منين قلب يعشق من جديد
اجيب منين حب تاني يعيش للجديد
سبت قلبي سنين وراح
لدنيا جديدة مش زي القديمة
لدنيا فاضية لونها بهتان مش زي اللي كان
لدنيا معانده احب من جديد
لدنيا معاندة قلبي يعيش سعيد. 

كلمتين (19)

كلمتين اتقالوا من زمان

الدنيا رحلة نعيشها في الإمكان

وان حد جرحك انساه وعدي اللي كان

وان رحت يوم ونسيت زمان

ارجع بقلبك للمكان

مكان لقاك ....

مكان ضحكة بتناديك في دنيا الروقان

ومكان جرحك اقفله

وخطي عتبه النسيان .

نص الطريق (18)

قلبي خوفه مليه

عقلي دايما ناسيه

حبي في آخر الطريق

مظلم و مخبي جرحي القديم

مظلم عايش في غربة وحنين

سايب قلبي في حاله

رافض يرجع لايامه

خايف من قلبي الكئيب

رايح و سايب حزني يفيض

رايح لغربة تانية

سايب احلامنا

سايب اوقاتنا

سايب قلبنا

يبكي في نص الطريق

و اعيش انا في نص الحلم البريء

من غير روح مرتاحة ولا ضحكة من عيني النسايه.

الباب (17) الجزء الاول//

مالي بقيت خايفة علي طول
عايشة في خوف دايما علي طول
سايبه الدنيا تيجي و تروح
ولا مني عايشة ولا مني في النوم
ولا ضحكة هنية لقلبي المكسور
و سايبة الضحكة لقلبي المهموم
و سايبه الدايرة تلف و تيجي
في بحر غريقة
و جثة كئيبة.
في باب مقفول بعيد عن عيني
لونه غريب عن عيني
خايفة اقرب اتجرح
خايفة اسيبه اتقتل من نفسي الوحشة المجهولة

#تتبع
ان شاء الله :-)

علي غير العادة (16)

صحيت متأخر علي غير العادة

حلم غريب سبته

ورحت لدنيا اغرب

سبت سريري مكرمش

ولبست لبس مكرمش

ملحقتش اعمل شاي

ملحقتش افطر كمان

وعلي غير العادة طلبت تاكسي

مهو تملي جيبي فاضي ومش مكفي

رغي كتير هري كتير

و مصر بتفرح ياولاد كمان

تمجيد كتير و ضحكة رخمة من قلب فاضي.

ورحت شغلي الممل

بنفس الابتسامة الرخمة في وشوش مملة

فتحت الشاشة و قفلت عقلي

هرحم نفسي امتي من ده كلام

هرحم نفسي امتي من ده شغل

و فتحت عقلي تاني فجأة

و قلت تاني بسرعة

مهمو جيبي فاضي ومش مكفي

وانا حزني مالي و مقضي. 

وداعا (15)

نظرة تأتي ونظرة تذهب

نظرة قصيرة كبيرة تعيد إلي ما مضي مجددا

نظرة خاظفه خجولة معجبه

تلك النظرة التي جعلتني اعيش في احلامي سعيدة

وبها الشخص الذي طالما حلمت به طوال عمري

نظرة مؤكدة حقا

تؤكد علي عشق كبير لا ينتهي

تؤكد علي حياة اخري جميلة مليئة بالالوان.

و فجأة انتهي هذا الحلم انتهي حقا

بكابوس صغير غير مرئي بكابوس ملىء بالوجع

ملىء بالدموع لا لا

الدموع لا تأتي اريدك انتي ان تأتي

اريدك لارتاح واعيش مجددا

لا استطيع ان اقف امام تلك النظرات

لا استطيع ان اقف امام قلبي واواجهه بالحقيقة المرة التي تقتلني كل يوم بل كل ساعة ودقيقة.

لا اريد ان اصدق ان كل هذا خيال اوهام حقا

لا اريد ان اصدق ان تلك الاصوات في مخيلتي فقط

لماذا يأتي الحب في هذا الوقت الخطأ في هذا المكان الغير مناسب

لماذا قلبي لا يريد ان يصدق انه ليس حبا

بل حقا احتياج للحب.

و اخيرا اريد ان اقول وداعا وانسي لابتدي.